Gschicht vo de Waldwaggis

1964:  D Grindig

Die drey Frind, Peter Weber (unsere Fätze) vo Muttez, Kurt Misteli vo Binnige und Robärt Meury, e Buuresoon vo Blaue, wo zämmen am glyychen Oort schaffe, grinde geege s Aend vom Joor 1964 d Gligge. Der Buuresoon stellt Wagen und Traggdoor, die andere baide soll e jeede no drey Maa bringe. Will dä Hoof z Blaue ganz ooben am Wald stoot, kemme die Drey uff der Namme „Waldwaggis“.   1965:  erschti Fasnacht                                                              Esoo kemme bis in Hoornig noodisnoo derzue: Erwin Sohm, Hanspeter Furrer und Beat Schüpbach vo Binnige, Urs Burkhardt, Marcel Thürkauf und Werner Schwob vo Muttez. Alli sinn im Alter vo ebbe 18–22 Joor. Der Kurt Misteli wird der erscht Obmaa. Uus Mangel an Zyt kunnt d Laarven und s Goschdyym vo der „Stange“. Der Wage wird in Blaue vom Robärt Meury fascht elai baut, kunnt me doch säll Joor, wääge z vyyl Schnee, nit zem Hoof uffe. Der Wage isch aifach mit Tannenescht verglaidet.  Mer erlääbe zämme e tolli, aber au wildi Fasnacht. Am Mittwuch, ebben am Vieri, schneyts der Cortège ewägg ! Mer sinn e weeneli beesi Waggis gsi, hejoo mer hänn e ganze  Huffe Saiblootere ghaa. Die sinn amen e Droot iberem Wage uffghänggt gsi. Isch aini kabutt gange, hesch die näggscht abghänggt ! E baar Lyychtreglaame hänn  schlächt uusgsee und hänn ys ebbis koschtet. Mer hänn beesi Rissel ghaa, au zooben in de Sääl vo de Masggebäll, woos sälbetsmool als no gää het.  Dasch s ainzige Fotteli woo mer vo der erschte Fasnacht hänn.     Kriise Noo der Fasnacht glemmts. Dää zämmegwiirflet Huffe fallt uusenander. Der Kurt Misteli schmeisst der Bättel aane und goot zue de Guggemyysli, der Werner Schwob zue der Negro Rhygass. Aanderi mien in d Regruteschuel oder woone nimm z Basel.   1966:  Neyuffbau Esoo blyybe der Fätze und der Urs ibrig. Die Zwai brobieren e Neyuffbau. Sy hoole noodisnoo e baar Manne vo der erschte Stund zrugg. 1967 bikunnt d Gligge äntlig „Struggtuure“: Der Urs Burkhardt wird an der erschten offizielle GV zem Obmaa gweelt und d Waldwaggis bykemme Statuute. Fir d Fasnacht 1968 simmer aber allewyyl noo zweenig Lyt zem uffem Wage Fasnacht z mache. 1969:  S isch esoo wyyt D Waldwaggis sinn mit em e neye Wagen und Faarer mit 6 Waggis an der Fasnacht derbyy. Dernoo goots ständig bärguff. Sythäär mache d Waldwaggis luggeloos Fasnacht und allewyyl sinn weenigschtens 8 Waggis uff em Wage.   1974:  D Waldwaggis und d IG Wage As Obmaa laadet der Urs Burkhardt 1972 alli Wagegligge ins Wiirtshuus „Waggis“ z Binnigen yy, zer meeglige Grindig vonere  IG- ooder EG-Wage. S glingt ys elai nit d Wäge derzue z bringen en Yykaufsgmainschaft ooder en IG-Wage z grinde. Druffaabe dien doch e baar Wagegligge zämme mit ys d Räppli, d Dääfeli, d Mimoosen und d Orangschen yykaufe. S Comité bikunnt Wind derfoo, hätt aber gäärn en IG as Aasprächpaartner wo meegligscht vyyl Wagegligge derbyy sinn. Der Felix Musfäld vom Comité duet dernoo, uff Aareegig vom Urs, im Joor 1974 d Wägen yylaade, zer Grindig vo der IG-Wage. Und jetz battets. Esoo sinn d Waldwaggis die  aigetligen Aastifter fir d IG-Wagen und hänn scho in den erschte Joor vom bistoo Spuure hinterloo. Vo 1981 bis 1996 isch der Urs Burkhardt, e Wyyl lang as Schryyber und dernoo as Delegierte im Aendstraich-Comité, und vo 1988 bis 2005 der Rolf Valentin, also e Wyyl lang  sogaar z zwait, im IG-Vorstand. Syt 2014 isch der Pierre Kunz im IG-Vorstand.   1989:  25 Joor Waldwaggis D Waldwaggis sinn zem Jubileeum drey Daag uff Minchen ans Oggtooberfescht gange.  Mer hänn d Filmstudio aagluegt und e glaine Film vom Schimanski draait, mit beweeglige Kulisse, das haisst rundumme seggle, as die rund Kulisse sich drillt. Der Schimanski het en entfieerti Frau grettet. S Auto isch zwoor  zerscht ruggwäärts gfaare, mer sinn, zum Gaudi, lätz ummegrennt, haha. Am Schluss hämmer das Filmli no kennen aaluege. Au d Wies’n hämmer nadyyrlig bsuecht und e huffe glungeni Lyt „droffe“. Mit em  Mass in der Hand bisch dert  mit alle per Du. Mer hänn drey heerlig scheeni Dääg in luschtiger Kameraadschaft erläbbt.   D Zyt lauft Der René Quinche wird fir vyyl Joor ins Ensemble vo de Raamestiggli im Drummeli gruefe.  Leider falle in die Zyt au die erschte Doodesfäll.  Unsere Grinder der Peter Weber, der Ex-Aggtivi Hansruedy Schwank und unsere Entwäärfer vo de Helgen am Wage, der Felix Weibel stäärben unverhofft. E ganz, ganz schwääre Schlaag fir d Waldwaggis.   1994:  30 Joor Waldwaggis D Waldwaggis sinn zem Jubileeum drey Daag uff Stuegert ans Fescht uff der Cannstatter-Waasen. S isch ebbis gloffe. E Taxischofföör kaan e Liedli singe, will är e baar pflottschnassi Waldwaggis in Stadt zruggdoo hett. Die hänn uff em Schifflibach e weeneli z fescht pflätteret. Es sinn drey scheeni Dääg in heerliger Kameraadschaft gsi und am Schluss simmer sogaar no mit em Fluugi iber Kloote  haim.   1999:  40 Joor Waldwaggis D Waldwaggis sinn zerscht bees an der Naase ummegfieert worde bis mer zletschtemänd in Bad Wimpfen (Gebiet Heilbronn) glandet sinn. Mer hänn e glungeni Walburgisnacht uff em e Schloss verbrocht, hänn e Wyy-Degustatioon am Neckar ghaa und hänn Bad Wimpfe am Stedtli-Fescht unsicher gmacht. Mer hänn der Plausch ghaa. Uffere Kutschefaart, em Neckar noo, het ys der Kutscher uffgläärt, as sy Ross Manfred haiss und e Wallach isch. Uff d Froog eb mer wisse was e Wallach isch, fallt vom René der Spruch:  „Jää, dernoo haisst äär aigetlig numme no Fred“ !   2003:  Die alte Segg An der GV 2003 wärde die alte Segg grindet. Kai “Äxtra-Club”. S isch s Aaltersasyyl vo de Waldwaggis. Alti, bewäärti Aggtivi kenne byydrätten und der Gliggen esoo erhaalte blyybe. Die alte Segg mache z Fuess Fasnacht., zem gniesse“.  Me goot zämme go ässe, me luegt e weeneli Cortège, bsuecht d Gliggekäller und.. und.. und, noo Luscht und Luune. En Iberdritt isch meeglig: Ab em fuffzigschte Altersjoor ooder 25 Joor aggtiv Fasnacht. Me zahlt allewyyl no der Aggtivbydraag. Me bikunnt uff der Aggtivlischte s „Addribut“ AS (Alte Sagg) ! Die alte Segg hänn aigeni Dräff, geen aber au noo Luscht und Luune zem Stamm an Hogg. E suuberi und gueti Sach.   2014:  50 Joor Waldwaggis Unglaublig, mer siinn 50 Joor alt. Zue dämm Aaloss hänn 5 alti Segg beschlosse, sy mache die Fasnacht noonemool mit. Esoo hänn die e glainen aigene Wage, uffbaut uff em e Schilter-Landwirtschaftsauteli, zämmebaschtlet. Der Stamm isch mit 12 Waggis hindedraa gfaare. Mer hänn nit s Jubileeum zem Sujet gmacht, nai mer hänn s Sujet „Mer hänn jo nyt“ gweelt. Uff baide Wägen oobe sinn die bikannte 3 Affe ghoggt. Bym Stamm isch s Originaal gsi: Y gsee nyt, y gheer nyt, y saag nyt. By den alte Segg hänn sy sich geegesyttig ebbis zueghebt, under em Motto; Y soll nyt gsee, Y kaa nyt gheere und y darf nyt saage ! S isch e „suuper“ Fasnacht gsi, mit heerligem Wätter (drey Daag Sunne). Het äscht der Fätze im Himmel fir unser 50scht Jubileeum bym Petrus e Woort yygleggt?   Jubileeumsbummel 50 Joor D Waldwaggis hänn nit gwisst woo aane ass dä Jubelbummel goot. Die zwai Organisatoore hänn dicht ghebt und ys allewyyl uff s Glattyys gfieert, hejoo isch der Bummel doch vom 1. bis 4. Merze gsii, zer Karnevaalszyt an vyylen Oort. Me het gmungglet: Rio, Kölln, Mainz, Würzburg, Venedig, etc, etc. Zem Schluss hänn 15 Waggis in Venedig der Carnevale gnosse. Der Himmel het am Aafang nit dicht ghebt. S het gräägnet, ass d Gassen in Venedig under Wasser gsii sinn. S hett nassi Fiess gää. Hesch au schoon emoole e riise Stau vo Gondole gsee mit luuter Jaapse dinne? S isch nyt me gange in de glaine Kanääl. S isch ibrigends e stille Carnevale mit wunderscheene Masgge, woon aifach e weeneli langwyylig ummesteen. Numme die wo doo steen sinn Amerikaaner, Ängländer, Franzoose, Dytschi und sunscht allergattig Natioone, numme weenig Veneziaaner. Die sinn in gschlossene Gsellschafte irgendnaime im e Saal, oder wie mer gsee hänn im e Theaater. Der Hit aber isch e Bsuech im e Kinschtler-Laarvenatelier gsii. Waaseliwaas isch äscht uuskoo? Lägg sy mache d Laarve genau glyych wie mir, uus „Babyyrmaschee“, aber hallo ! S hett en interessanten Uusdusch vo baidsyytigem Wisse gää. D Kinschtlere het gschtuunt, sy het unseri Fasnacht nit kennt. Mer sinn schyynbaar die erschte Bsuecher gsii, wo vom glyyche gschwätzt hänn. Mir hänn derfiir gschtuunt iber die vyyle „ Mooltächnige“ wo sy ghaa het. Uff em Haimwääg het e Bsuech bym Wyybuur MASI im Veneto nit derfe fääle. S isch e ganz tolle Bummel gsii und wie allewyl hämmer zämmen e feyni Kameraadschaft ghaa!

 

Download